धुलाबारी । शैक्षिक क्षेत्रमा नाम कमाएको धुलाबारीको इष्ट होराइजन अंग्रेजी माविले जीवन उपयोगी शिक्षा पद्धतिलाई प्राथमिकतामा राखेर कक्षा सञ्चालन गर्दै आएको छ ।

पढाइसँगै अतिरिक्त क्रियाकलापमा राष्ट्रिय तथा अन्तर्राष्ट्रिय स्तरमा चर्चा कमाएको उक्त माविले विद्यार्थीको माग अनुसारका विषय छनोट गरेर त्यही अनुरुपको शिक्षा प्रदान गरिरहेको छ । जसका कारण विद्यार्थी र अभिभावकको रोजाइमा इष्ट होराइजन मावि सधैँ पर्ने गरेको छ । अध्ययन र अनुशासनको दायरालाई विद्यार्थीको जीवनसँग जोडेर शैक्षिक क्रियाकलापहरु हुँदै आएको स्कूलका प्रिन्सिपल सञ्जिव राईले बताए ।

उनले निजी विद्यालयको शैक्षिक गतिविधि पृथक हुनुपर्ने बताए । ‘प्राइभेट स्कूलमा अभिभावकहरुले पैसा तिरेर नानीहरु पढाउने गर्नु भएको छ,’ उनले भने, ‘त्यसैले पढाइको क्वालिटीसँगै पुराना र नयाँ खोज अनुसन्धान गर्ने कुरामा नानीहरुलाई उत्प्रेरित गर्न सक्नुपर्छ ।’
एनप्याब्सन झापाका पूर्व अध्यक्ष समेत रहेका शिक्षासेवी राईले निजी विद्यालयहरुले विद्यार्थीको गतिविधि उजागर गर्ने खालको शिक्षा दिनुपर्नेमा जोड दिए । उनले सबैको साथ र सहयोगले गर्दा इष्ट होराइजन मावि यहाँसम्म आइपुगेको बताए ।

विद्यालयमै सागसब्जी उत्पादन र बिक्री

मेचीनगर–१० मा अवस्थित इष्ट होराइजन मावि परिसरमा तरकारी खेती (करेसाबारी) गरिएको छ । विद्यार्थीले नै तरकारी रोपेर विक्री वितरण गर्दै आएका छन् । तरकारी फलाएर विद्यार्थीले स्कूलका शिक्षकहरुलाई बेच्ने गरेका हुन् ।

मूल्यमा मोलमोलाई गरेर शिक्षकहरुलाई तरकारी विद्यार्थीले बेच्छन् । यसो गर्नुको कारण चाँहि– पछि गएर विद्यार्थीले कृषि वा अन्य व्यवसाय गर्दा मोलमोलाई गर्न सकुन् भन्ने हो । मोलमोलाई गर्दा भविष्यमा उनीहरुको व्यवसाय सफल बन्नेमा विश्वास गरिएको छ ।

लोप हुँदै गएका सामग्रीको संग्रहालय

अहिलेको पुस्ताले पुराना सामग्रीको महत्व विस्तारै बिर्संदै गएका छन् । गाउँ–समाजमा ढिकी, जाँतो प्रयोग गर्न छाडिएको छ । अझ अहिलेका पुस्ताले ढिकी, जाँतो कस्तो हुन्छ भन्ने कुरा सुनेको मात्रै छन् । पुराना सामग्री लोप हुँदै गएपछि विद्यालयले ती सामग्री संग्रहालयमा राखेर विद्यार्थीलाई महत्व बुझाउने प्रयास गरिरहेको छ ।

त्यस्तै, विद्यालयले कुकिङ ल्याब सञ्चालन गरेको छ । विद्यार्थीले मिठो–मिठो खानेकुरा पकाएर शिक्षकलाई बेच्ने गरेको विद्यालय प्लस टु को–अर्डिनेटर रेखा क्षेत्रीले बताइन् । सँगसँगै सिलाई बुनाई तालिम पनि नियमित सञ्चालन गरिएको उनले बताइन् ।
यस्तै, विद्यार्थीलाई दुनाटपरी बनाउन सिकाउने साथै प्लविङ, इलेक्ट्रिसियन तालिम दिने गरेको क्षेत्रीले बताइन् । ‘अध्ययन, अतिरिक्त क्रियाकलापसँगै विद्यार्थीलाई पुराना कुराका बारेमा हामीले शिक्षा दिइहेका छौँ,’ उनले भनिन्, ‘ताकि भविष्यमा विद्यार्थीले पुराना कुरालाई अँगालेर नयाँ सुखद जीवन जिउन सकून् ।’

अनुशासन पहिलो सर्त
विद्यालयमा अनुशासनलाई महत्वपूर्ण पाटोको रुपमा हेरिन्छ । अनुशासन भएन भने अध्ययन नतिजा राम्रो निस्कन सक्दैन । त्यही भएर इष्ट होराइजन माविले अनुशासनलाई पहिलो शिक्षाको रुपमा लिएर पालना गराइरहेको विद्यालयका अनुशासन विभाग प्रमुख प्रेमनारायण डाँगीले बताए । उनले विद्यालयमा अध्ययनत् १५ सय विद्यार्थीका निम्ति अनुशासन पाटोलाई महत्वपूर्ण बनाएर लागू गरिरहेको बताए । ‘विद्यार्थी आफँै अनुशासित बन्नुपर्छ,’ उनले भने, ‘हामीले बनाएका नियमले उनीहरुलाई नै असल बनाउने शिक्षा दिइरहेको हुन्छ ।’

शिक्षक महेश खड्काले यस विद्यालयका विद्यार्थीहरुले विभिन्न विधामा राम्रो प्रदर्शन र नतिजा निकाल्न सफल भइरहेको बताए । उनले विद्यार्थीको चाहना र शिक्षकको मेहनतबाट नै सफलता हात पार्न सकिएको बताए ।

प्रतिक्रिया

सम्बन्धित खवर

ताजा समाचार

लोकप्रिय